Биздин театрда көп жылдан бери иштеген, ар кандай мамлекеттик сыйлыктардын ээси болгон ардактуу кызматкерлерибиз 7000 сом айлык алышат. Бул тууралуу Бакыт Акматов Sputnik Кыргызстан радиосунун таңкы эфиринде маек куруп жатып билдирди.
Анын айтымында, Баткен облусу чек арада жайгашкандыгына байланыштуу төлөнчү төлөмдөрдү кошкондо жогоруда айтылган сумма келип чыгат.
"Облустук театрда негизинен көп жылдан бери эмгектенген жамаат иштейт. Айлык маянаны аз деп айта албайбыз, анткени аймак үчүн бул да чоң акча. Бизде эң жогорку айлык акы көп жылдык эмгек стажы бар кызматкерлерге берилип, 7000 сомду түзсө, эң азы 4000-5000 миң сомдун тегерегинде. Акырындап маяналарыбыз жогорулайт деп ишенебиз. Анткени мамлекет тарабынан соңку жылдары сезилерлик колдоо көрсөтүлүп жатат. Алардын бири - биздин театрдын аппаратурасы бюджеттин эсебинен толугу менен жаңыланды. Мындай камкордук чыгармачыл адамдарга эргүү тартуулайт", — деди Акматов.
Ал театрга жаш кадрларды тартуу көйгөйү курч экенин кошумчалады.
