БИШКЕК, 22-мар — Sputnik. Жалал-Абад облусуна караштуу Аксы районунда ичимдик ичкен үч адамдын бири киши колдуу болсо, экинчиси суицид жасады. Бул тууралуу облустук ички иштер башкармалыгынан кабарлашты.
Милициянын маалыматына караганда, окуя 27-февраль күнү Кашка-Суу айылдык округунда болгон.
"Алардын ортосунда чуу чыгып 55 жаштагы киши каза болгон. Бир күн өткөндөн кийин 40 жаштагы киши өзүнө-өзү кол салган. Ал эми эки күндөн кийин кылмышка шектелип ичимдик ичкендердин үчүнчүсү (26 жашта) Бишкектен кармалды", — деп ОИИБден билдиришти.
Аталган факт 130-берененин ("Адам өлтүрүү") негизинде Кылмыштардын жана жоруктардын бирдиктүү реестрине каттоого алынды. Ал эми шектүү убактылуу кармоочу жайга киргизилди.
