БИШКЕК, 19-мар. — Sputnik. Бишкек шаарынын мэриясы "Аламүдүн" паркынын аймагындагы муниципалдык жерлерди бошотуп жатат. Бул тууралуу муниципалитеттен маалымдашты.
Ага ылайык, мэриянын 2005-жылдын 18-августундагы токтому менен "Аламүдүн базары" ЖЧКсына Буденный жана Муса Жалил көчөлөрүнүн кесилишиндеги 13 миң чарчы метр жер 49 жылга ижарага берилген. Ал жердеги парк оңдолуп, жеңил констркуциядагы социалдык маданий мүнөздөгү объектилер курулмак.
Көчмө комиссиянын жеринде болгон жыйынында аталган жер тилкеси өз максатында колдонулбай жатканы жана "Аламүдүн" паркынын аймагында архитектуралык-техникалык корутундусу жок 11 объекти бар экени аныкталган.
Андан сырткары, "Аламүдүн базарынын" администрациясы тарабынан муниципалдык жерди өзүм билемдик менен колдонуп жаткан факты ачыкка чыккан. Аталган аймактагы жеңил типтеги 16 объекти алынып, жыйынтыгында шаарга 40 сотыхтан ашык жер кайтарылды.
