БИШКЕК, 8-мар. — Sputnik. Өспүрүмдөр менен иш алып баруу инспекциясынын кызматкерлери борбор калаада рейд жүргүзүп, көчө кезген 72 баланы аныктады. Бул туурасында Бишкек ШИИБдин маалымат кызматы билдирди.
Инспекторлор базарларды, компьютердик клубдарды, кафе, бар, түнкү клуб жана имараттардын жер төлөсүн кыдырганы айтылат. Иш-чара үч күн бою жүргүзүлүп, ага 287 милиция кызматкери катышкан.
"Үч күндүн ичинде селсаяк жана кайырчы болуп жүргөн 72 өспүрүм аныкталды. Анын ичиненен төртөө балдар интернатына, дагы төртөө социалдык баш калкалоочу жайларга жиберилди. ИИМдин Жашы жете элек балдардын укук бузууларынын алдын алуу борборуна 35 бала, калаанын төрт районуна 29 өспүрүм жеткирилди. Мындан сырткары, үч баланын иштеп жүргөнү жана алты кылмыш иши ачыкталды", — деп айтылат маалыматта.
Рейддин максаты үйүнөн чыгып кеткен, жашоо-шарты оор, селсаяк жана кайырчылык кылып жүргөн балдарды аныктоо болуп саналат.
