Борбор калаада фура унаасы менен жолго шар чачып бара жаткан видеону Sputnik Кыргызстан агенттигине WhatsApp каналы аркылуу окурман жиберди.
Ал кадрдан жүк ташуучу унаа жолдун ортосу менен жүрүп артынан бирөө түстүү шарларды ыргытып жатканын көрүүгө болот. Ары-бери өткөн айдоочулар токтоп шарларды унаасына салып кетүүгө да жетишишти. Акция атайын 8-март аялдардын эл аралык майрамына карата уюштурулганы айтылат.
Бирок мындай куттуктоого нааразы болгондор да чыкты. Алар шар алууга чуркап чыккан адамдар кооптуулук жаратып жатканын айтып, анын калдыктары таштанды ыргытканга барабар болот дешүүдө.
Ал эми Жол кыймылы коопсуздугун камсыздоо башкы башкармалыгы уюштуруучулар аталган акцияны өткөрүүгө уруксат алганын билдирди. Шар чачкан фураны автоинспекторлор коштоп жүргөн.
Калаа мэриясынын маалымат казматы уюштуруучулар райондук администрациядан уруксат албаганын айтты. Мындан улам алардын аракети мыйзамсыз деп каралып, териштирүүдөн кийин коомдук жайга таштанды таштаганы үчүн айып пул салынышы ыктымал.
