Парламенттик башкаруу системасында статс-катчы институтунун иштеши эң маанилүү. Бул тууралуу Акрам Мадумаров Sputnik Кыргызстан радиосунун таңкы эфиринде маек куруп жатып билдирди.
Анын айтымында, статс-катчылардын даражасы министрдин биринчи орун басарынын деңгээли менен барабар.
"Статс-катчы көз карандысыз институт. Аны министр каалаган учурда кызматтан алып кое албайт. Атайын кеңештин макулдугусуз иштен алуу болбойт. Премьер-министр отставкага кеткен учурда өкмөттүн бардык мүчөлөрү дагы отставкага кетет. Ошондо министрликтеги жоопкерчилик статс-катчыга жүктөлөт. Себеби министрдин кетиши менен иш токтоп калбай, аппарат жөндөмдүү болушу керек. Ал эми аппараттын ишмердүүлүгүн статс-катчы тескейт. Анын даражасы министрдин биринчи орун басарынын деңгээлине барабар. Ал министрликтеги балансты кармап, сактап турат", — деди Мадумаров.
Ошондой эле ал статс-катчынын кызматтык орду туруктуулугу менен айырмалана тургандыгын кошумчалады.
