БИШКЕК, 20-фев. — Sputnik. Кыргызстанда кат түрүндө дилбаян жазуу боюнча жаштардын эл аралык сынагы башталат. Бул туурасында Билим берүү жана илим министрлигинен кабарлашты.
Бул иш-чара аталган министрлик менен мамлекеттик "Кыргыз почтасы" ишканасы менен биргеликте өткөрүлмөкчү. 2-апрелге чейин улана турган сынак "Өзүңдүн каарманың жөнүндө жаз" деп аталат. Каттар кыргыз жана орус тилдеринде кабыл алынат. Катышуучулардын курагы 15 жаштан улуу болбошу керек.
Бул Дүйнөлүк почта союзунун колдоосу менен эпистолярдык жанрдагы дил баяндарды жазуу жаатындагы жаштардын эл аралык 48-конкурсунун алкагында өтөт. Ага жыл сайын 192 өлкө, анын ичинен Кыргызстан да катышат.
Иш-чара эл арасындагы достукту бекемдөө, жаштардын өзүнүн оюн эркин, көркөм сүрөттөп жана сабаттуу жазуусун калыптандыруу максатын көздөйт.
Sputnik Кыргызстандын да катты почта эмес, сайт аркылуу жазган "Айылга кат" аттуу рубрикасы бар. Анда айылдан ааламга аттанып кеткен замандаштардын кичи мекенге болгон толгонуусу берилет.
