Дүйнө жүзүндѳ, анын ичинде Кыргызстанда да аялдар экономика чөйрѳсүндѳ басмырлоого кабылып жатат. Бул тууралуу Элиза Асилбекова Sputnik Кыргызстан радиосунун таңкы эфиринде маек куруп жатып билдирди.
Анын айтымында, чоң кызматта иштеген аялдар эркектерге караганда 20 пайызга аз акы алат.
"Изилдөөлөргө таянсак, эркектердин тѳрттѳн үч бѳлүгү жумуш менен камсыздалса, аялдардын жарымы гана иштейт. Чоң кызматтарды аркалаган аялдарга болсо ошол эле ишти жасап жаткан эркектерге караганда дээрлик 20 пайызга аз акы тѳлѳнѳт экен. Дүйнѳ жүзүндѳ, анын ичинде Кыргызстанда да аялдар экономика чѳйрѳсүндө басмырлоого кабылууда. Ири компаниялар аялдарды жумушка алууга кызыкдар эмес. Балалуу болуп, наристесин үйдө отуруп карап калат деп ишке алгысы келбейт. Мындай көрүнүштү таптакыр жок кыла албашыбыз мүмкүн. Бирок кыздардын, аялдардын жеке ишкерлик кылуусуна жардам көрсөтүп, коомчулук колдоп турушу керек", — деди Асилбекова.
Ал аял киши билимдүү болсо балдарынын да ийгилиги көп болорун кошумчалады.
