БИШКЕК, 19-фев. — Sputnik. Борбор калаада айрым мектептер баланы 1-класска электрондук каттоосу жок эле кабыл алат. Бул тууралуу Билим берүү жана илим министрлигинин маалымат кызматы кабарлады.
Маалыматка ылайык, электрондук каттоодон №61 физика-математикалык мектеп-лицейи, №5 улуттук компьютердик мектеп-гимназиясы бошотулган.
Мэриянын билим берүү башкармалыгынын жетекчисинин орун басары Наталья Никифорова эки мектептин эмне себептен электрондук каттоо системасына кирбей турганын түшүндүрүп берди.
"№5 улуттук компьютердик мектеп-гимназиясы жалпы республикага карайт. Ал жакка балдар өлкөнүн ар кыл аймагынан келип окугандыктан бул системага кирген жок. Ал эми №61 физика-математикалык мектеп-лицейи окуу-тарбиялык комплекс болгондуктан микроучастоктордон бошотулган. Мектеп окуучуларын мектепке чейин эле өзүнүн бала бакчасынан окутуп баштайт", — деди Никифорова.
Мындан сырткары, ал пилоттук долбоорго тиешеси жок Бишкектеги билим берүү жайларын да тизмектеп берди.
Музыкалык мектепке бергиси келген ата-энелер дагы электрондук каттоого турбай эле баласын 1-класска киргизе алары белгилүү болду.
Эске салсак, 15-февралдан тарта "Бишкек шаарынын мектептерине электрондук каттоого туруу" пилоттук долбоору иштей баштады.
Билим берүү жана илим министрлигинин маалыматында, 15-февралдан 19-февралга чейин Бишкекте 1-класстын 520 болочок окуучусу электрондук каттоодон өткөн.
"Азыркы учурда "Мектепке электрондук каттоо" системасына 520 арыз түштү. Ар бир саатта 20дан 40ка чейин адам катталууда.
"mektep.edu.gov.kg сайтына 8000ден ашык адам кирди", — деди министрликтин маалымат кызматы.
"Мектепке электрондук каттоо" долбоору — бул мамлекеттик жана муниципалдык жалпы билим берүү уюмдарына мектеп курагындагы (6-7 жаш) балдарды автоматтык түрдө каттоону камсыз кылган маалыматтык система.
Электрондук каттоого туруунун жол-жобосун кененирээк төмөнкү материалдан окуй аласыздар.
