БИШКЕК, 18-фев. — Sputnik. Кыргызстанда 20-февралдан 22-февралга чейин туруксуз аба ырайы күтүлөт. Бул тууралуу ӨКМден кабарлашты.
20-февралда күндүз Чүй, Талас, Ош, Жалал-Абад, Баткен облустарынын көпчүлүк аймактарында жаан, кар жаашы күтүлөт.
21-февралда дагы көпчүлүк аймактарда кар жаап, Чүй, Ош, Жалал-Абад, Баткен облустарынын кээ бир райондорунда жаан-чачын катуу жаашы мүмкүн. Ысык-Көл жана Нарын облустарында 21-22-февралда кар жаайт.
Жолдор тайгак жана тоңголок болот. Тоолуу райондордо кар күрткүсү пайда болот. Батыштан соккон шамалдын ылдамдыгы секундасына 4-9 метрден, Чүй, Талас, Ысык-Көл, Нарын облустарында 15-20 метрге чейин жетет.
Ысык-Көл ойдуңунда түнкүсүн —5…-10, күндүз 0…-5, Нарын облусунун дыйканчылык аймактарында жана тоолуу райондордо түнкүсүн —19…-24, күндүз —6…-11 градус суук болушу болжолдонууда.
23-февралда жаан-чачын күтүлбөйт. Жолдор тоңголок, тайгак болот. Тоолуу райондордо кар күрткүсү пайда болот. Батыштан соккон шамалдын ылдамдыгы секундасына 4-9 метрге жетет.
Бийик тоолуу райондордо жана Суусамыр өрөөнүндө түнкүсүн —30…-35, күндүз —10…-15 градус суук болот.
Мындай туруксуз суук аба ырайы энергетика жана коммуналдык кызматтардын ишин жана кышкы жайыттарда малды кармоону кыйындатат. Катуу жаан жааган убакта унаа жолдордо көрүү аралыгы төмөндөп, автоунаалардын кыймылын кыйындатат.
