2015-жылга чейин ИИМдин академиясын 250-270 курсант аяктап, офицердик наам ыйгарылчу. Бул тууралуу Адилет Бийбосунов Sputnik Кыргызстан радиосунун таңкы эфиринде маек куруп жатып билдирди.
Анын айтымында, жаңы курсанттарды кабыл алууда бир катар талаптар бар.
"Милиция кызматкерлери катышкан акыркы терс окуяларда эч кимди актагым келбейт. Ушундай бирин-серин окуялар жалпы милиция кызматкерлеринин кадыр-баркына көө жаап жатат. Акыркы жылдары академия сандан сапатка өтүүгө бел байлады. Буга чейин окуу жайды жылына 250-270 бүтүрүүчү аяктап келсе, эми жылына 120га жакын курсант академиянын бүтүрүүчүсү болууда. Кабыл алууда дагы талаптар катуу. Айтсак, талапкерлер медициналык текшерүүдөн өтөт, ден соолугуна, аң-сезимине, психикалык туруктуулугуна көңүл бурулат. Жалпы билим берүүдөгү предметтерден сырткары, адам укугун коргоо жаатындагы сабактарга басым жасалат", — деди Бийбосунов.
Ошондой эле ал академияга жаңы тапшырган курсанттардын 10 пайызы аскердик тартипке чыдабай, үч айда эле окуусун таштап кетээрин кошумчалады.
