БИШКЕК, 7-фев. – Sputnik. Былтыркы 2018-жыл ысык аба ырайы боюнча рекорд жарата албаганы менен тарыхтагы эң аптаптуу төрт учурдун бирине кирди. Бул туурасында NASA өкүлдөрүнүн маалыматына таянып РИА Новости билдирди.
"2018-жыл кезектеги ысык жылдардын бири болуп, глобалдык жылуулукка "өз салымын" кошту. Анын кесепетин АКШнын жээктерин каптаган суулардан тарта илеби катуу аптаптан көрүүгө болот", — деп билдирген космостук иликтөөлөр институтунун директору Гэвин Шмидт.
2015-жылдан тарта Жердеги температура ай сайын көтөрүлүп, орточо эсеп менен 1-1,5 градуска чыгып турган. Илимпоздордун көзүнө түшкөн факты 2016-жылдын биринчи беш айында жана августта болгон. Анда Арктика менен Россиянын кээ бир аймактарында кадимки норма 5-9 градуска көтөрүлүп кеткен.
2018-жылы Жердин температурасы орточо эсеп менен XX кылымдагы абалда алып караганда 0,83 градус жогору болгон. Өткөн мезгилдердей эле глобалдык жылуулук биздин планетанын бардык аймагына өзүнүн таасирин тийгизип, бирок өзгөрүүлөр ар башка жыйынтыкты көрсөткөн.
Аны Чыгыш Сибирдин, Арктиканын, борбордук Европанын жана Жакынкы Чыгыштын жашоочулары өзгөчө сезген. Анда орточо температура жаңы рекорд коюп, нормадан 2-5 градуска көтөрүлгөн. Кызыгы, температура Россиянын Урал аймагында, Канада менен Казакстанда бир топ төмөндөгөн.
РИА окумуштуулардын маалыматына таянып, 2018-жыл эң ысык деген жылдардын катарына киргендигин жазды. Былтыркы жыл 2015, 2016 жана 2017-жылдарга гана орун бошоткон.
Шмидт температура боюнча жаңы рекорддор адамзатка жакшы эч нерсе алып келбей тургандыгын айткан. Бул өзгөчө россиялык, канадалык, америкалык жана европалык Арктикага кесепетин тийгизерин билдирген. Ал аймактар жакынкы жылдары улам тездик менен эрип, тоңдон кутулган жерден парник газдарынын көп бөлүнүп чыгышына, ал эми бул глобалдык жылуулукту тездетүүгө алып келерин кошумчалаган.
