Эл аралык каттам менен жүк ташыган 1500 унаа лицензия ала албай жатат. Алардын ар биринин 2-3төн айдоочусу бар. Бул тууралуу Талантбек Маткерим уулу Sputnik Кыргызстан радиосунун эфиринде маек куруп жатып билдирди.
Анын айтымында, лицензиясынын мөөнөтү аяктап, каттамга чыга албай жаткан айдоочулардын саны күндөн-күнгө көбөйүүдө.
"2019-жылдын 1-январынан тарта кирген жаңы кодекстерге байланыштуу жүк жана жүргүнчү ташууга лицензия берүү мыйзамында лицензиянын баасы көрсөтүлбөй калган. Транспорт министрлиги баалар Жогорку Кеңештин макулдугу менен өкмөт тарабынан коюларын айтып жатат. Айдоочулар эски баа менен лицензия бере берүүнү суранып жатабыз, бирок министрлик буга макул эмес. Биз көйгөйдү чечүүгө аракет кылып, өкмөткө, парламентке кат жолдодук. Эч кандай жооп ала албай келебиз. Лицензиясы бүтүп, каттамга чыга албай калып жаткан транспорттордун саны күндөн-күнгө көбөйүүдө", — деди Маткерим уулу.
Ал мыйзам бир эле эл аралык жүк жана жүргүнчү ташуудагы транспортторго эмес, өлкө ичиндеги автоунааларга да тиешелүү экендигин кошумчалады.
