UFC жетекчиси Хабиб менен Конордун реванш-беттешинин шартын айтты

БИШКЕК, 1-фев. — Sputnik. Мушкерлердин абсолюттук чемпионатынын (UFC) жетекчиси Дана Уайт россиялык чемпион Хабиб Нурмагомедов менен ирландиялык мушкер Конор Макгрегордун реванш-беттеши кандай шартта өтүшү мүмкүн экенин айтты. Бул тууралуу ESPN телеканалынын эфиринде сөз болду.

Уайттын айтымында, уюмда эки спортчуга тең атаандаш бар. Андыктан, экөө бири-бири менен рингге чыгуудан мурда башка атаандаш менен күч сынашып көрүшү керек.

"Конор менен Хабибдин беттеши жакын арада болбойт. Анткени Хабиб четтетилген. Негизи ал алгач Тони Фергюсон менен, ал эми Конор Дональд Серроне менен таймаш өткөрүшү керек. Экөө тең жеңген учурда гана реванш-беттешти уюштуруп беребиз", — деди UFC президенти.

Невада штатынын атлетика комиссиясы Нурмагомедов UFC 229 турниринде Макгрегор менен беттешкенден кийин чыгарган жаңжалы үчүн 9 айга четтетилип, 500 миң доллар айыпка жыгылган. Ал эми чырга катышты деп кине коюлган Макгрегор жарым жылга дисквалификацияланып, 50 миң долларлык жазага тартылган. Комиссия, мындан сырткары, Хабибдин командасындагы Абубакар Нурмагомедов жана Зубайр Тухуговду да дисквалификациялап, 25 миң доллардан айып салган.

Эскерте кетсек, беттеш былтыр 6-октябрда өткөн. Жеңишке жетишкен Нурмагомедов таймаштан кийин алгач атаандаш тарап менен кер-мур айтышып, андан соң тосмодон секирип өтүп, мушташа кеткен. Натыйжада NSAC териштирүү иштерин баштаган.