2000-жылы "Скорпион" атайын даярдыктагы бөлүктүн аскерлерине Зардалынын тоо этектеринен согушкерлер кол салган. Бул тууралуу Улан Орозалиев Sputnik Кыргызстан радиосунун Баткен согушунун 20 жылдыгына арналган эфиринде маек куруп жатып билдирди.
Анын айтымында, согушкерлер гранатамет менен кол салган учурда анын омуртка бели сынып, эки жарым жыл төшөктө кыймылсыз жаткан.
"Бизге Зардалынын тоолорунда моджахеддер жүрөт деп маалымат келди. Аны текшерүүгө баратканда бизге согушкерлер гранатамет менен кол салышты. Ошондо белимен жаракат алдым. Эки жарым жыл баспай, төшөктө жаттым. Бул мөөнөт аралыгында 12 жолу операция болдум. Абдан кыйналдык. Дарыгерлер, профессорлор баспай калышы мүмкүн дегенде жалгыз энекемдин үмүтү өчкөн жок. Энеме абдан ыраазымын. Ал кишинин үмүтү мага дем-күч берип, азыр басып, өз оокатымды өзүм кылып жүрөм", — деди Орозалиев.
Ошондой эле жоокер мекени үчүн майып болуп калгандыгына бир дагы жолу өкүнүп көрбөгөндүгүн баса белгиледи.
