БИШКЕК, 25-янв. — Sputnik. Казакстанда 42 градуска жеткен суук болорун Sputnik Казакстан Казгидрометке шилтеме кылып кабарлады.
Мындан улам шашылыш билдирүү таратылган. Өлкөнүн түндүгүнөн өткөн муздак антициклон менен Орто Азиянын үстүнөн өткөн жылуу аба ырайы түштүк-чыгыш Казакстандагы катуу шамалга жана ашууларда кардын түшүүсүнө себепкер болот.
Кыргызстанда кандай болот?
Кыргызстанда да күн сууктай турганы, бирок аяздын күчү Казакстанга жетпеси айтылды. Маалыматты Sputnik Кыргызстанга Кыргызгидрометтин метеорологиялык божомол бөлүмүнүн жетекчиси Махбуба Касымова берди.
"Аба ырайы 27-28-январда 9-10 градуска чейин төмөндөйт, бирок андан суук болбойт. Арктикалык аба Чүй облусуна тие өтөт, бирок катуу аяз андан ашпайт", — деди Касымова.
Ал Кыргызстанда былтыркыдай суук болбой турганын кошумчалады.
