БИШКЕК, 28-дек. — Sputnik. Жаңы жыл майрамына карата шаардык милиция күчөтүлгөн тартипте кызмат өтөөгө өттү. Бул тууралуу Бишкек ШИИБдин маалымат кызматы билдирди.
Ага ылайык, 31-декабрь күнү борбордук "Ала-Тоо" аянтында 2 миңден ашык милиция кызматкери иштейт. Андан сырткары, аянтка кире бериш жакта көзөмөл өткөрүүчү пунктулар иштейт.
"Ири, саюучу, кесүүчү, күйүүчү, жарылуучу буюмдарды жана курал жарактарды алып келүүгө тыюу салынат. Андай буюмдардын баары көзөмөл өткөрүү пунктунан алынат", — деп айтылат маалыматта.
Милиция, андан сырткары, шек жаратуучу нерселерди көрүп калган учурда тезинен 102 номерине чалып кабар берүүнү суранат.
Ошондой эле майрам күндөрү балдарды кароосуз калтырбоону өтүнөт.
