90-жылдары Кыргызстандагы камсыздандыруу компанияларын өнүктүрүү үчүн Европа өлкөлөрү ири суммадагы гранттарды бөлө баштаган. Бул тууралуу Эрнис Абдыкеев Sputnik Кыргызстан радиосунун "Ачык кеп" программасынын эфиринде маек куруп жатып билдирди.
Анын айтымында, кайтарымсыз каражатка ээ болуп калуу максатында өлкөдө бир күндүк компаниялар түзүлө баштаган.
"90-жылдарда өлкөбүздө 50дөн ашык камсыздандыруу компаниялары бар болчу. Дал ошол маалда Европа өлкөлөрү бизге мындай компанияларды өнүктүрүү үчүн грант бөлө баштайт. Ал каражатка ээлик кылып калуу максатында шылуундар бир күндүк ишкана түзө калып, кийин кайра жабылып кеткен. Абал 2000-жылдардан кийин нугуна түштү. Финансылык рынокту жөнгө салуу кызматы көзөмөлдөө жүргүзүп, кырдаалды турукташтырды. Азыркы компаниялар — рынокто 10 жылдан ашуун иш алып баргандар. Ар биринин туруктуу кардары бар. Абал кыйла жакшырды", — деди Абдыкеев.
Ошондой эле ал учурдагы камсыздандыруу компанияларынын көрсөткөн кызматынын сапаты жогору экендигин кошумчалады.
