БИШКЕК, 27-дек. — Sputnik. Балыкчы шаарында узундугу эки метр, туурасы 1 метр 20 сантиметр, бийиктиги 80 сантиметрге жеткен жыгач арабанын инсталляциясы жасалды. Бул тууралуу Sputnik Кыргызстан агенттигинин жергиликтүү кабарчысы билдирди.
Араба Жусуп Абдрахманов көчөсүндөгү райондук электр тармактарынын имаратынын маңдайындагы аянтчадан орун алды. Ал шаарды көрктөндүрүү максатында жасалганын "Жашылдандыруу жана көрктөндүрүү" чарбасынын башчысы Марат Таржиев билдирди.
"Биздин ишкана башынан эле шаарга кооздук берүүчү нерселерди жасоого басым жасайт. Кыргыз элинин каада-салтын, үрп-адатын жайылтып, улуттук идеологиясын көтөрө турган инсталляцияларды жасайлы деп чечкенбиз. Араба жашылдандыруу мекемесинин ичинде эле жасалды. Үстүнө туя отургузуп, кошумча жасалма гүлдөр менен кооздодук. Эми чүкө, калпак жана тыйындын инсталляцияларын жасайлы деген оюбуз бар", — деди Таржиев.
Инсталляция шаардагы авариялык абалда деп кыйылган бактан жасалды. Таржиев кошумчалагандай, жараксыз бактардын жакшы жерлери ушул сыяктуу инсталляцияларга колдонулуп, калганы отун катары аз камсыз үй-бүлөлөргө, мүмкүнчүлүгү чектелген жарандарга бөлүп берилет.
