Мамлекеттик тил боюнча мыйзам кабыл алынганына быйыл 29 жылдын жүзү болду, бирок тил маселеси республикада керектүү деңгээлде өнүкпөй келет. Анткени системалуу иш жүргүзүлгөн эмес. Мындай пикирин Назаркул Ишекеев Sputnik Кыргызстан радиосунун эфиринде маек куруп жатып билдирди.
Анын айтымында, кыргыз тили көптөгөн кылымдар бою оозеки өнүгүп келгендиктен, иш кагаздарына келгенде терминология маселеси көйгөй жараткан.
"Совет доору кыргыз тили үчүн жакшы заман болду. Тил — техникалык, маданий, илимий жана экономикалык терминдерге байыды. Ошол эле учурда кыргыз тилинин өнүгүүсү орус тилинин таасиринен улам басымга кабылгандай сезилип келген. Бирок Кыргызстан өз алдынча эгемендүүлүк алып, мамлекеттик тил боюнча мыйзам кабыл алынганына 29 жылдын жүзү болсо да тилибиз өнүгүп кеткен жок. Мунун башкы себеби — системалуу түрдө иш жүргүзүлбөгөндүгүндө. Мамлекеттик тил комиссиясы өлкөдө тил саясатын жүргүзөт, ал эми анын өнүгүүсү үчүн жалпыбыз жапа тырмак киришишибиз керек", — деди Ишекеев.
Ошондой эле ал глобалдашуу заманында эне тилди сактап калуунун негизги жолу кош тилдүүлүктү колдоо экенин кошумчалады.
