Министрликтер ички ресурстарды пайдаланып өрчүтүп-өнүктүрүүнүн ордуна донорлордун гана эсебинен жашап калды. Мындай пикирин Бакыт Төрөбаев Sputnik Кыргызстан радиосунун таңкы эфиринде маек куруп жатып белгилеп өттү.
Анын айтымында, мындай көрүнүш өлкөдө коррупциянын гүлдөшүн өбөлгөлөп жатат.
"Транспорт жана жолдор, Билим берүү жана илим, Саламаттык сактоо жана Финансы министрликтери эл аралык донорлордон келген каражатты бөлүштүрүп коюп гана отурушат. Алардын эч бири ички ресурстарды колдонуп иш алып барууну приоритет катары көрбөй жатат. Мындай көрүнүш, албетте, коррупциянын өнүгүшүн шарттайт жана өлкөнү карызга батырып, элдин кыжырын кайнатат. Биз депутаттар жаңы дайындалган финансы министрине да айттык. "Сиз эми кассир болуп отуруп албай, жакшы иштеңиз" дедик. Анткени аталган министрликтин жүргүзгөн саясатынан бүтүндөй өлкөнүн экономикасы көз каранды", — деди Төрөбаев.
Ал министрлер бир гана өз тармагынын кыйын адиси болбой, мыкты саясатчы жана эсеп-кысапты жүргүзө билген адам болушу керектигин кошумчалады.
Эскерте кетсек, үстүбүздөгү жылдын 12-декабрында Бактыгүл Жээнбаева финансы министри болуп дайындалган. Анын талапкерлигин өкмөт сунуштап, 101 депутат колдогон.
