БИШКЕК, 24-дек. — Sputnik. Жалал-Абадда чийки нефти өткөн түтүктү тешип мунай уурдаган деген шек менен жергиликтүү тургун кармалды. Бул туурасында облустук милициядан билдиришти.
Маалыматка ылайык, нефти Кочкор-Ата шаарындагы "Кыргызнефтегаз" ААКтан Жалал-Абад шаарындагы "Петрофакт" ишканасына жердин асты менен түтүк аркылуу жеткирилчү.
"Ушул жылдын 8-ноябрында Сузак районунун Камыш-Башы айылындагы Көк-Арт сайынын жээгинен эки киши түтүктү тешип, ага шланг улап Hyundai Porter унаасына чиркелген болжол менен 1,5 тонналык цистернага нефти куюп кетүүгө аракет кылган. 500 литрдей мунайды куюп бүткөндө түтүктөрдү текшерип жүргөн "Кыргызнефтегаз" ААКтын 4 кызматкери көрүп калган. Эки кылмышкер унаасын таштап качып кеткен", — деп айтылат маалыматта.
Аталган факты боюнча Кылмыш-жаза кодексинин 164-беренеси ("Уурулук") боюнча кылмыш иши козголду.
Иликтөө иштеринин натыйжасында 22-декабрда кылмышка шектүү катары 31 жаштагы Сузактын Күмүш-Азиз айылынын тургуну кармалып, күнөөсүн моюндаган. Шектүү убактылуу кармоочу жайга киргизилди. Ал эми экинчиси изделүүдө.
Мындан сырткары, бул кылмышка тиешеси бар болушу мүмкүн делген милиция кызматкерлеринин үстүнөн ИИМдин атайын кызматы иликтөө жүргүзүп негиздүү далил тапкан эмес.
