БИШКЕК, 19-дек. — Sputnik. Сооронбай Жээнбековдон журналисттер маалымат жыйыны учурда президент эмне үчүн Кытайдагы этникалык кыргыздар абакта жатат деген маалыматтар боюнча үн катпай жатканын сурашты.
Өлкө башчы Кытай менен болгон катнашка өтө аяр мамиле кылуу керектигин айтты.
"Алыскы туугандан жакынкы коңшу артык" деген сөз бар. Силер берген суроодо дипломатиянын эң жогорку мамилеси керек. Ал жактагы кыргыз туугандарыбыз Кытай элинин жараны, ал жакта Кытайдын мыйзамдары иштеп, ошого баш иет. Биз алардын ички ишине кийлигише албайбыз. Биз азыр дипломатиялык каналдар менен иштеп жатабыз. Буга этият мамиле кылыш керек", — деди Жээнбеков.
Президент ошондой эле бакырып чыкса эле баары чечилип кетсе, өзү биринчилерден болуп "коё бер эле, коё бер" деп чыкмактыгын айтты.
Жээнбеков бул багытта дипломатиялык каналдар менен иштер жүрүп жатканын дагы бир жолу эскертти.
