БИШКЕК, 12-дек. — Sputnik. Бишкектин тургундары жаңы жылдык балатыларды Медеров менен 7-Апрель көчөлөрүнүн кесилишинен сатып ала алат. Бул тууралуу мэрия билдирди.
Аталган даректеги базар 10-декабрда ачылып, ушул айдын соңуна чейин иштейт. Бул жерден карагайдын бир нече түрүн сатып алууга болот.
Балатылардын баары тамыры менен сатылууда, аларды майрамдан кийин жерге отургузуп коюуга болот. Сатуучу-консультанттар анын жол-жобосун түшүндүрүп бере турганы айтылды.
Мындан тышкары, 21-23-декабрь күндөрү Курманжан датканын эстелигинин жанында белек жарманкеси ишин баштайт. Бул жерден эл өзгөчө, кийизден, жибектен жасалган буюм-тайымдарды, жасалгаларды сатып ала алат.
Жарманкеге Кыргызстан, Өзбекстан, Казакстан жана Түркмөнстандан 30дан ашуун кол өнөрчүнүн келиши күтүлүүдө.
Борбордук "Ала-Тоо" аянтында башкы балатынын оту кантип жанганын көрдүңүз беле? Арманда калбай көрүп коюңуз.
