БИШКЕК, 3-дек. — Sputnik. Кыргызстанда жаңы жылдан кийин күйүүчү жана майлоочу майлардын баасы кымбаттабай турганын Өнөр жай, энергетика жана жер казынасын пайдалануу мамлекеттик комитети билдирди.
Бүгүн, 3-декабрда, Кыргызстандын нефтетрейдерлер ассоциациясы 1-октябрга чейин Россия менен индикативдик балансты (күйүүчү майды бажы алымы жок жеткирүү) макулдашуу керек болгонун, бирок ал дагы деле ишке аша электигин маалымдаган. Андыктан 2019-жылдын 1-январынан тарта бензиндин баасы 2, 5 – 3 сомго чейин көтөрүлүшү мүмкүндүгү айтылган.
"2018-жылдын октябрында биздин мамлекеттик комитет менен Россиянын Энергетика министрлигинин ортосунда сүйлөшүү жүрдү. 2019-жылга карата алып келе турчу көлөм быйылкынын деңгээлинде калды. 22-ноябрда биз Энергетика министрлигине кийинки жылдын балансына кол коюуга даяр экенибизди билдирип маалымат жөнөттүк. Жакында Өнөр жай, энергетика жана жер казынасын пайдалануу мамлекеттик комитетинин жетекчилиги кол коюу үчүн Москвага барат", — деп айтылат билдирүүдө.
