БИШКЕК, 1-дек. — Sputnik. Ысык-Көл облусунун Ак-Суу районунда Жол кыймылы коопсуздугун камсыздоо башкармалыгынын кызматкерлери автокырсыктарынын алдын алуу максатында түнкүсүн жарыкты чагылдыруучу тасмаларды байлап жатат.
Бул иш-чара райондун борбору болгон Теплоключенко айылында башталды.
"Элеттиктер талаага кароосуз кое берген бодо мал, жылкылар жол четине чыгып кетип, аларды автоунаа уруп кеткен учурлар кездешүүдө. Быйыл ушундай мүнөздөгү төрт кырсык Ак-Суу районунда катталды. Андыктан, малга жок дегенде караңгыда жарыкты чагылдырган тасма тагуу менен бул кырдаалдан чыгалы деп жатабыз",— деп айтышкан Ак-Суу райондук ЖКККнын кызматкерлери.
Эске сала кетсек, бул идея Ысык-Көл облусунун Тоң районунун тургуну өзүнүн жылкыларына жарыкты чагылдырган тасмаларды тагып, аны видеого тартып, Whatsapp тиркемесине жайгаштыргандан кийин башталган. Бул ишти алгач Тоң районундагы автоинспекторлор колго алган.
2018-жылдын 10 айында Ысык-Көлдө малды койдуруп кеткен 33 окуя катталып, анын кесепетинен алты адам жаракат алган.
