Жалал-Абад облусунун Сузак районунда кыз-келиндерди кыйнап иштеткен сойкукана табылды. Бул тууралуу Жалал-Абад милициясынын маалымат кызматынан билдиришти.
Атайын ыкчам тергөө тобу түзүлүп, 26-ноябрь күнү аталган жайга тинтүү жүргүзүлгөн. Натыйжада бир топ кыздарды алып чыгып, иштетип жүргөн ээсин аныкташты.
Кыздардын милицияга сойкуканадагы турмушу тууралуу айтып берген видеосу Жалал-Абал ОИИБинин YouTube каналына жүктөлдү.
Видеодо өзбек тилинде сүйлөп жаткан кыздын айтымында, анын сойкулуктан баш тартканына карабай алып калышкан.
"Мени чоң-чоң кардарларга салып берип коюшат. Бир жолу сабалып, жыныстык органдарым катуу жабыркаганда дагы ооруканага алып барышкан жок. Жадакалса иште деп кайра кыйнашты. Азыр жатыным ооруйт. Телефон колдонсок дагы катуу уруп салышат", — деди ал.
Экинчи аялдын сөзүнө караганда, ал ушул жерде иштеп жүрүп балалуу болгон.
"2009-жылдан баштап иштейм. Боюмда болуп калып, иштей албай калганда кожойке аябай кыйначу. Жүрөккө, өпкөгө катуу-катуу муштап, өлтүрүп салам деп коркутчу. Чай иче калайын деп отурсам, балаң менен нандын баарын түгөттүң деп депкир менен сабачу. Ошентип башымды жарды, денемде соо жерим калган эмес. Ошого карабай күндүз кечке иштеп, түнү менен кардар тейлемей", — дейт экинчи видеонун каарманы.
Үчүнчү кызды кожойкеси кардарларга даттанасың деп бутуна бычак сайып, бир көзүн азиз кылып койгону айтылат.
"Кыйнап иштетип жатканын кардарларга айтып коет деп коркконбу, айтор, бир жолу катуу сабап, бутума бычак сайды. Ошондон кийин майып болуп калдым. Башка-көзгө койгулай берип бир көзүм дагы көрбөй калган", — деди ал.
Жабыр тарткан кыздар менен учурда психологдор иштеп, Жалал-Абад шаарындагы калыбына келтирүү борборуна жеткизишти.
Ал эми аталган факты боюнча Кылмыш-жаза кодексинин 261-беренеси ("Сойкулук жасоо үчүн жайларды уюштуруу же күтүү") менен кылмыш иши козголду.
