БИШКЕК, 27-ноя. — Sputnik. Жогорку Кеңештин депутаты Таабалды Тиллаев Конституциялык мыйзамдар, мамлекеттик түзүлүш, сот-укук маселелери жана Жогорку Кеңештин Регламенти боюнча комитеттин жыйынында Кытайдагы этникалык кыргыздарга өкүмзорлук болуп жатканы боюнча тараган кабарлардан улам өкмөттөн маалымат угууну сунуштады.
"Кытайдагы кыргыздар тууралуу өкмөткө тапшырма берсек, бизге маалымат беришсин. Тышкы иштер министрлиги да маалымат берип койсо, анткени коомдо парламент үн катпай жатат деген пикирлер айтылууда", — деди Тиллаев.
Ал эми депутат Исхак Масалиев бул жерде Кыргызстандын жарандары эмес, кытай жарандары тууралуу сөз болуп жатканын айтып, ар бир нерсени атынан атоону билдирди.
Эл өкүлү Тиллаев: "Бири-бирибиздин сөзгө комментарий бербесек, кыргыз болгондон кийин биздин жаран болбогондо кимдин жараны? Бизден кеткен этникалык туугандар", — деген пикирин айтты.
Андан сырткары, саясат кылбай эле маалыматты угуп коюуга чакырды.
Дүйнөлүк бир катар ЖМКлар учурда Кытайдагы атайын "саясий тарбиялоочу борборлордо" мусулмандарга карата зордук-зомбулук болуп жатканын айтышууда. Алардын арасында уйгурлар, этникалык казактар менен кыргыздар дагы бар.
