БИШКЕК, 21-ноя. — Sputnik. Кыргызстандык мигрант кыз тууралуу орус режиссеру Сергей Дворцевойдун "Айка" тасмасы Норвергияда өткөн FILM fra SØR эл аралык фестивалында сыйлыкка татыды. Бул тууралуу Sputnik Казакстан агенттиги жазды.
Кинофестивалда бардыгы болуп Азия, Африка жана Латын Америкасынан келген 80дей тасма көрсөтүлдү.
Калыстар тобу "Көркөм тасма", "Көрүүчүлөр сыйлыгы", "Жаңы добуш" жана "Күмүш күзгү" номинациялары менен мыктыларды тандады. "Айка" фильми "Жаңы добуш" сыйлыгына ээ болду.
"Камера башкы каармандын ар бир дем алуусуна чейин кылдаттык менен көрсөтүп бере алган. Аны карап отуруп мигрант кыздын жаны менен биригип, анын көзү менен көрүп калгандай болдук", — деп айтышты норвегиялык кино сынчылар.
Кинофестивалга тасманын жаратуучулары катыша албай калгандыктан, сыйлык ал өлкөдөгү казак дипломатына тапшырылды.
Россиялык режиссер Сергей Дворцевойдун "Айка" тасмасы Канн кинофестивалында ийгилик жаратып, башкы каарманды аткарган Самал Еслямова "Аялдын мыкты ролу" сыйлыгына ээ болгон.
