Ал кезде айылдык балдар үчүн Фрунзедеги окуу жайлардын бирине тапшыруу кол жеткис кыял болчу. Ошондуктан бири-бирибизге кызгануу менен мамиле кылчу элек. Бул тууралуу Дамира Абдразакова Sputnik Кыргызстан радиосунун КТРКнын 60 жылдыгына арналган эфиринде маек куруп жатып баяндады.
Анын айтымында, музыкалык окуу жайдан алган билими КТРКда иштеп калуусуна себепчи болгон.
"Биздин класстан Мукаш Абдраев атындагы музыкалык мектебине конкурс аркылуу Чынара Карыпбаева өтүп кетти. Ичим ачышып, мен дагы ал мектепте, Фрунзеде окушум керек дедим. Көп ыйладым. Акырында апам мени ээрчитип алып шаарга келди. Ал жерден Буланбек Исаковго жолугуп калдык. Ал мени ырдатып көрдү, үнүмдү, ритмди, тембрди текшерип эле "алабыз" деди. Ошентип окуу жайга өтүп кеттим. Чынара Карыпбаева мыкты окугандыктан анын сүрөтү залда илинип турчу эле. Ага эрегишип жакшы окудум. Кийин 1983-84-жылдары үй-бүлө күтүп, бала-чакалуу болуп калгандан кийин Анарбек Майнанкулов телевидениеде үн режиссерлугуна орун бар деп калды. Ошентип КТРКга келип, бул чөйрөгө аралашып кеттим", — деди Абдразакова.
Ошондой эле ал КТРКдагы эмгек жолун "Ала-Тоо" маалымат программасынын режиссерлук пультунан баштап, кийин "Сайра комуз", "Ыр кесе" маданий программаларында уланткандыгын кошумчалады.
