БИШКЕК, 27-окт. — Sputnik. Кыргызстандык эки киши террордук уюмдун катарына жай жарандарды чакырып, үндөгөндүгү үчүн күнөөлүү деп табылды. Бул туурасында Түштүк-Кавказ аймактык сотунан кабарлашты.
Тергөөнүн маалыматына караганда, алар "Исламдык азаттыкка чыгаруу партиясы" — "Хизб ут-Тахрир аль-Ислами" уюмуна мүчө болуп, аны менен кошо Севастополдо идеологиясын жайылтып келген. Кыргызстандыктар аталган уюмдун 2003-жылдан бери террордук деп таанылып, РФ аймагында ишмердүүлүгүнө тыюу салынганына карашкан эмес деп айтылат.
"Кармалгандар "Хизб ут-Тахрирдин" идеологиясын майда-чүйдөсүнө чейин окуп, атайын маалыматтарды алышкан. Аны менен кошо эле Конституцияга каршы ишке бара ала тургандарды издеп таап, катарына тартууга, үгүттөөгө үйрөнүшкөн", — деп айтылат маалыматта.
2016-жылдын август айында кыргызстандыктар ФСБ тарабынна кармалган. 42 жаштагы жаран 15 жылга, ал эми андан улуурагы, 50 жаштагы киши 13 жылга эркинен ажыратылган. Сот аларды катуу тартиптеги абакка отурууга өкүм чыгарган.
