БИШКЕК, 17-сен. — Sputnik. Өлкө башчысы Сооронбай Жээнбеков бүгүн, 17-сентябрда "Ала-Арча" мамлекеттик резиденциясында ишкерлер менен жолугуп, келечекте атаандаштыкка жөндөмдүү, инновациялык технологияларды кеңири колдонгон, инвестициялар үчүн ыңгайлуу экономиканы түзүү керектигин айтты.
Президент өз сөзүндө бүгүнкү жолугушуунун максаты бышып жетилген курч көйгөлөр жөнүндө ийри олтуруп, түз кеңешүү экенин белгиледи.
Ошону менен бирге ишкерлерге тоскоол болуп жаткан жагдайларды жоюу боюнча иш жүргүзүлүп жатканы белгиленди. Алсак:
— жаӊы түзүлгөн бизнести текшерүүгө 3 жылга мораторий киргизилди;
— салык процедурасын фискализациялоо системасы киргизилүүдө;
— технологиялык жабдууларды импорттогон ишкерлер бажы төлөмдөрүнөн бошотулду;
— тигүү тармагындагы жеке ишкерлерди камсыздандыруу төлөмдөрү 27 пайыздан 12 пайызга төмөндөтүлдү;
— кепилдик фонду түзүлүп, бир жылдын ичинде эле 535 ишкерге кепилдик берилди;
— мамлекеттик-жеке өнөктөштүк долбоорун ишке ашыруу процедурасын жөнөкөйлөштүрүү максатында мыйзамдын жаңы редакциясы парламентке киргизилди.
Жээнбеков ошондой эле ишкерлердин өкмөттүн, сот системасынын, укук коргоо органдарынын дарегине айта турган олуттуу дооматтары жана суроолору бар экенин, алардын басымдуу бөлүгү жүйөөлүү дооматтар экенин кошумчалады.
