БИШКЕК, 14-сен. — Sputnik. Бишкек — Ош жолундагы тоннелден өтүү үчүн төлөнгөн акча трассаны тейлөөгө жана жумушчулардын айлык акысына жумшалат. Бул тууралуу Sputnik Кыргызстан агенттигине Транспорт жана жолдор министрлиги билдирди.
Буга чейин Sputnik Кыргызстан агенттигинин окурмандары WhatsApp-канал аркылуу акча алынганы менен жолдордун сапаты өтө начар экенин айтып нааразы болушкан.
Министрлик Төө-Ашуудагы Көлбаев атындагы жана "Кара-Көл" тоннелдеринен өтүү үчүн ар бир унаадан 25 сомдон 275 сомго чейин алынарын маалымдады.
"Каражаттын баары тоннелдерди тейлөөгө жумшалат. 2018-жылдын биринчи кварталында эки тоннелден алынган акчанын суммасы 9 миллион 540,4 миң сом болду", — деп айтылат билдирүүдө.
Төлөм бир гана жолу алынат, эгер адам түндүктөн түштүктү көздөй бара жатса "Сосновка" постунан, эгер түштүктөн түндүктү карай келе жатса "Кара-Көл" постунан төлөйт.
Каражат төмөнкүчө бөлүштүрүлөт:
— айлык акы — 5 миллион 866,6 миң сом;
— Соцфондго төлөм — 1 миллион 126,5 миң сом;
— тоннелдерди тейлөөгө — 2 миллион 547,3 миң сом.
Эки пунктуда жалпы жонунан 90 киши иштейт, алардын арасында милиция кызматкерлери, медиктер жана куткаруучулар бар.
