Чүй облусунун Эфиронос айылында сүт ташыган машина менен жеңил унаа кагышканын күбө Sputnik Кыргызстан агенттигинин WhatsApp номери аркылуу билдирди.
Чүй облустук ички иштер башкармалыгынын ЖКККБсынын маалымат кызматы жол кырсыгы болгонун тастыктады.
"Жол кырсыгы Чүй облусунун Панфилов районундагы Эфиронос айылына жакын жердеги трассада болгон. ВАЗ-2107 автоунаасы менен сүт ташыган ЗИЛ машинасы кагышкан. Анын кесепетинен сүт ташыган автоунаа оодарылып калган", — деп милициядан маалымдашты.
Чүй облустук милициясынын алдын ала маалыматы боюнча эки айдоочу жол талаша кетип, биринчиси экинчисин озуп өтүүгө аракет кылган. Жол кырсыктан эч ким жаракат алган эмес. Бардык материалдар тергөө органдарына берилди.
