БИШКЕК, 10-сен. — Sputnik. "Сапат" эл аралык билим берүү мекемеси боюнча чечимдер негиздөөчүлөрдүн жалпы чогулушунда кабыл алынат. Бул туурасында КРдин Билим берүү жана илим министрлигинин маалымат кызматынан кабарлашты.
КРдин Билим берүү жана илим министрлигинен "Сапат" менчиктин аралаш түрүндөгү мекеме экендиги жана ишмердүүлүгүн Кыргызстандын мыйзамдары менен алып бара тургандыгын билдирген.
"Курамын өзгөртүү же мүлктөрүн башка тарапка өткөрүп берүү чечими түптөөчүлөрдүн жалпы жыйынында кабыл алынат. Алардын катарына Кыргызстандын жарандары менен Билим берүү жана илим министрлиги кирет", — дешти министрликтен.
Андан сырткары "Маарифтин" ишмердүүлүгү жаатындагы маселе боюнча анын иши тууралуу өкмөттөр аралык макулдашуунун долбоорун даярдай турган атайын топ түзүлгөн. Долбоор парламентке жөнөтүлүп, документ ратификация процедурасынан өтүшү керек.
"Сапат" учурда 16 лицейден, "Ала-Тоо" университетинен жана эл аралык, Silk Road жана дагы бир мектептен турат.
Сентябрдын аягында Кыргызстанга расмий иш сапар менен келген Түркия президенти Режеп Тайип Эрдоган келип, анда "Маариф" фондусунун КРдеги ишмердүүлүгү боюнча Меморандумга кол коюлган.
Фонду 2016-жылдын 17-июнунда Түркияда негизделген. Ал мамлекеттин Билим берүү министрлигине көз каранды болбой иштейт, бирок бул Түркиянын атынан чет өлкөлөрдө билим берүү мекемелерин ачууга укугу бар бирден бир уюм. Сайттагы расмий маалыматына караганда, "Маариф" ар кыл өлкөлөрдө бала бакчаларды, мектептерди жана университеттерди ачуу иштерин алып барат. Учурда алардын 21 мектеби өлкөнүн ар кыл өлкөлөрүндө иштеп жатат. Расмий эмес маалыматтарга караганда, алар мурда FETO карамагында болгон жайларды менчиктештирип алган.
