Алгач атчан баатырлар Көчмөндөр оюндарынын туусу менен көөкөргө куюлган мөңгү суусун көтөрүп саxнага алып келишти. Мөңгү суусу олимп оту сыяктуу Көчмөндөр оюндарынын символу болуп калмакчы. Аларды Көчмөндөрдүн улуу күрөшүнө чыккан Кыргызстандын мыкты спортчулары Нурбек Кожобеков менен Тилек Куралов тосуп алды.
Андан кийин премьер сөз сүйлөп Көчмөндөр оюндарын расмий түрдө жабык деп жарыялады.
Расмий бөлүгү жабылып, ата мекендик жана дүйнөлүк жылдыздардан 500гө чукул артист майрамдык маанай тартуулады. Эл алардын ырын жөн гана угуп отурган жок, шатыра-шатман ортого чыгып чер жаза бийлешти.
Көчмөндөрдүн дүйнөлүк III оюндарын өткөрүүгө жалпы жонунан 303 миллион сом сарпталды. Ал эми байге фондунун көлөмү 28 миллион сомду түздү.
ДКОнун программасына спорттун 37 түрү киргизилген. Анын ичинде 15 мамлекеттин улуттук оюндары бар. 74 өлкөдөн (Россиянын 12 субъектиси) 1976 спортчу келип күчүн сынады.
Ал эми маданий иш-чаралардын чордону болгон Кырчындагы этно шаарчага 200 миңдин тегерегинде жергиликтүү жана чет элдик коноктор келген.
Көчмөндөр оюндарын 56 мамлекеттен 604 Жалпыга маалымдоо каражатынын (ЖМК) өкүлү келип чагылдырды. Тагыраак айтканда 50 телеканал, 12 радио, 67 маалымат агенттиги, 48 гезит жана 50 блогер дүйнөгө таратты. Ал эми ата мекендик 70 ЖМКнын 700дөн ашуун өкүлү өз ишин алып барды. Анын ичинен 25 интернет басылма, 7 радио, 30дан ашуун телеканал жана 12 гезит-журнал.
