ЧОЛПОН-АТА, 8-сен. — Sputnik. Көчмөндөрдүн дүйнөлүк үчүнчү оюндарынын жабылыш аземинде президент Сооронбай Жээнбеков түрк тарапка идишке куюлган мөңгү суусун өткөрүп берет. Бул тууралуу биринчи вице-премьер-министр Кубатбек Боронов маалымдады.
Анын айтымында, идишке мөңгү суусу толтурулуп ат майданга алып келинет. Мөңгү суусу олимп оту сыяктуу Көчмөндөр оюндарынын символу болмокчу.
"Мөңгүлөрдү сактап калуу учурдун чоң көйгөйү. Ошондуктан биз аны кокустан тандап алган жокпуз. Мөңгү суусу куюлган идишти өткөрүп берүү олимп отун тапшырган жөрөлгө сыяктуу өтмөкчү. Иш-чаранын жабылыш аземинде өткөндөгүдөй, бирок азыркы жашоого басым жасалган көчмөндөрдүн философиясы тууралуу да айтылат", — деди Боронов.
Көчмөндөрдүн дүйнөлүк үчүнчү оюндарынын жабылыш аземи бүгүн, 8-сентябрда кечки саат 20:00дө Чолпон-Ата ат майданында өтөт.
Белгилей кетсек, 2020-жылы Көчмөндөр оюндары Түркия мамлекетинде болмокчу.
