Учурда көчмөндөрдүн дүйнөлүк III оюндарынын алкагында өтүп жаткан "Мөңгү" кино форумунун максаты – жаратылышты сактап калуу. Бул тууралуу Ника Темирова Sputnik Кыргызстан радиосунун таңкы эфиринде маек куруп жатып билдирди.
Анын айтымында, экологиялык көйгөйлөрдү чечүүгө коомчулуктун жапырт киришүүсү абзел.
"Бул иш-чарада көрсөтүлүп жаткан тасмалар табиятка жана этнос темаларына багытталган. Кино форумду уюштуруп баштаганда экологияга байланыштуу фильмдер аз болсо керек деп ойлогом. Бирок катышуу үчүн арыз берген режиссерлордун көп экени жана алардын жаратылыштагы көйгөйлөрдү тасма аркылуу берүүдөгү көз карашы мени таң калдырды. Тасма жаратуучулардын глобалдык маселерге кайдыгер карабаганы кубантаарлык көрүнүш. Мындан кинолор коомго тартууланып, канчалык бир деңгээлде жыйынтык болот деп ойлойбуз", — деди арт-директор.
Ал кино форумда көрсөтүлүп жаткан ар бир тасманын көрүүчүгө айтайын деген ою терең экенин кошумчалады.
