БИШКЕК, 30-авг. — Sputnik. Саламаттык сактоо министрлиги Көчмөндөр оюндары өтчү жайларда тамеки тарткандар айыпка жыгыла турганын кабарлады.
Министрликтин маалымат кызматынын консультанты Елена Баялинованын айтымында, Көчмөндөр оюндарына карата атайы кабыл алынган концепцияда иш-чара өтчү жайларда чылым чегүүгө тыюу салган пункт бар.
Ал эми саламаттык сактоо министринин орун басары Эркин Чечейбаев Кырчын жайлоосунда, Чолпон-Ата шаарындагы ат майдан менен спорт комплексинде тамеки тартууга болбой турганын тастыктады. Биринчи жолкусунда ыктыярчылар эскертүү берет.
Талапка ылайык, тамеки тартып кылтакка илинген адамдар 500 сом, кызмат адамдары 1000-2000 сом, ал эми юридикалык тараптар 10 миңден 50 миң сомго чейин айып тартат.
Буга чейин Кырчын жайлоосунда ичкилик сатууга тыюу салынганы айтылган.
