Майрам күндөрү Кыргызстанда кандай аба ырайы болот

БИШКЕК, 28-авг. — Sputnik. Кыргызгидромет 31-августта, 1-2-сентябрда өлкө боюнча кандай аба ырайы болорун маалымдады.

Ага ылайык, 31-августта түнкүсүн Ысык-Көл облусунда жаан жаап, күн күркүрөп, бийик тоолуу райондордо кар жаашы мүмкүн. Калган аймактарда жаан-чачын күтүлбөйт, батыштан соккон шамалдын ылдамдыгы секундасына 4-9 метрден, Ысык-Көл, Нарын облустарында 15-20 метрге чейин жетиши ыктымал.

Чүй облусунда түндө 8…13 градус жылуу, күндүз 23…28 градуска чейин ысык болот. Таласта түндө 3…8 градус жылуу болуп, күндүз күн 22…27 градуска дейре көтөрүлөт. Ош, Жалал-Абад жана Баткен облустарында түндө 10…15 градус жылуу, күндүз 25…30 градуска чейин ысыйт. Ысык-Көл менен Нарында түндө 3…9 градуска чейин жылуу болуп, күндүз 18…23 градуска чейин көтөрүлөт.

Ал эми 1-2-сентябрда түнкүсүн жаан-чачын күтүлбөйт. 2-сентябрда күндүз тоолуу райондордо жаан жаап, күн күркүрөшү мүмкүн. Батыштан соккон шамалдын ылдамдыгы секундасына 4-9 метрге чейин жетери божомолдонууда.

Аба ырайы Чүй облусунда 1-2-сентябрда түндө 10…15 градус жылуу, күндүз күндүн табы 25…30 градуска чейин жетет. Таласта түндө 5…10 градуска чейин жылуу болуп, күндүз 24…29 градуска чейин көтөрүлөт. Ош, Жалал-Абад жана Баткен облустарында түнү 12…17 градуска дейре жогорулап, күндүз 27…32 градус ысык болот. Ысык-Көл менен Нарын облустарында түндө 4…10 градуска чейин жылуу болуп, күндүз абанын температурасы 20…25 градуска чейин жетет.