Жайдын акыркы, күздүн алгачкы күндөрү. Келерки жумага карата аба ырайы

БИШКЕК, 26-авг. — Sputnik. Кыргызгидромет келе жаткан жумага карата аба ырайынын божомолун айтты.

Билдирмеге караганда, жуманын алгачкы күндөрүндө тоолуу аймактарда жана тоо этектеринде гана жаан жаабаса, өрөөндөрдө күн ачык болот.

27-28-августта тоолуу райондордо өткүн өтүп, күн күркүрөшү күтүлөт. Ош, Баткен жана Жалал-Абад облустарында аба ырайы түнкүсүн 12…17, күндүз 27…32 градус ысык болот. Чүйдө түнкүсүн 10…16, күндүз 25…30, Нарын менен Ысык-Көлдө күндүз күн 20…25 градус нөлдөн жогору.

29-августта батыштан соккон шамалдын ылдамдыгы секундасына 4-9, Ысык-Көл, Нарын облустарында 15-20 метрге жетиши мүмкүн. Ош жана Жалал-Абад облустарында күндүн табы түнкүсүн 12…17, күндүз 27…32 градуска көтөрүлөт. Ысык-Көл жана Нарында салыштырмалуу мээлүүн, түнкүсүн 6…11, күндүз 20…25 градус жылуу болот.

30-августта Чүй, Ысык-Көл облустарынын көпчүлүк аймактарында өткүн өтүп, бийик тоолуу жерлерде кар жаашы божомолдонууда. Өлкөнүн бардык аймактарында абанын температурасында мурдагы күндөгүдөн чоң айырмачылык болбойт.

31-август күнү жаан-чачын күтүлбөйт. Чүй облусунда абанын температурасы түнкүсүн 10…15, күндүз 24…29 градус ысык болсо, Таласта түнкүсүн 7…12, күндүз 22…27. Түштүк региондо күндүз 32 градуска чейин ысык болот.

Аптанын акыркы күндөрү дагы жаан-чачын болбойт. Абанын температурасы бир аз жогорулайт.