БИШКЕК, 23-авг. — Sputnik. Нью-Йорк университетинин психологдору "бир көрүп сүйүп калуу мүмкүнбү" деген суроого жооп издешкенин Daily Mail басылмасы жазды.
Окумуштуулар адамдын мээси кандайдыр бир кооздукту туюуп андан ырахат алууга бир гана секунд жетиштүү экенин далилдешкен.
Изилдөөнүн алкагында профессор Денис Пелли жана анын докторанты Энн Брильман сулуулукту "өлчөп" ал күнүмдүк турмушка кандай таасир берерин билүүнү максат кылышкан.
Изилдөөнүн катышуучулары кайсы бир ишке алаксып жатса дагы кооз нерсеге көңүл бурбай койгон эмес.
"Сулуулукту баамдоого көп убакыт керек деген ой кеңири тараган. Бирок биздин тажрыйба бир көрүп сүйүү үчүн бир секунддай эле убакыт жетиштүү экенин көрсөттү", — деди изилдөөнүн авторлору.
Алар ошондой эле "сулуулук ырахат сезимдерин тартуулайт" деген философдордун кебин тастыкташты.
