БИШКЕК, 22-авг. — Sputnik. Майлуу-Суу шаарында аскер кызматкерин трасформатордон токко урунуп, анын оң колун чыканагына чейин ампутациялашты. Бул тууралуу КРдин Куралдуу күчтөрүнүн кургактагы аскерлеринин маалымат кызматынан билдиришти.
Кырсык 19-август түнү болгон.
Маалыматка караганда, 22 жаштагы жоокер кызматындагы бир күндүк нөөмөт учурунда электр тогунун көмөк чордонунун аймагына кирген.
"Көмөк чордондогу тыюу салынган белгиге карабастан трансформаторго кирип, токко урунган. Натыйжада эки колу күйүп калган", — деп айтылат билдирүүдө.
Аскер кызматчысы Майлуу-Суу шаарындагы, андан соң Ош шаарындагы ооруканаларга дароо жеткирилген, кийинчерээк Бишкек шаарындагы Травматология жана ортопедия илим изилдөө борборунун күйүк борборуна которулуп, ал жерден оң колу чыканакка чейин ампутацияланган.
Иликтөөнүн материалдары Жалал-Абад гарнизонунун Аскердик прокуратурасына жөнөтүлгөн.
