Дүйнөнүн төрт бурчунда тилин, салтын билбесе да өздөрүн кыргыз атап жүргөн калктар бар. Мисалга алсак, фую кыргыздары же Алтай аймагындагы кыргыздар. Бул тууралуу Тыныстан Арзыбаев Sputnik Кыргызстан радиосунун таңкы эфиринде маек куруп жатып билдирди.
Анын айтымында, кыргыз илимпоздору Алтай конференциясына мүчө болгондон тартып кыргыздардын дүйнөгө таралуусу боюнча бир топ жаңы маалыматтар топтолуп, ачылыштар жасалды.
"Тили, жашоо образы, салт-санаасы өзгөрүп кеткен менен өздөрүн кыргызбыз деген элди кездештирүү, албетте, тарыхчылар үчүн баалуу маалымат. Аларды изилдеп, Кыргызстан менен байланыштыруу да илимпоздордун иши. Мына ушундай кадамдарды жасоого Алтай конференциясы чоң өбөлгө түзүүдө. Дүйнөлүк окумуштуулар менен баарлашып, маалыматтык көпүрө жаралууда. Конференциянын алкагында өзгөчө тарых, филолог жаш окумуштууларыбызга мүмкүнчүлүктөр кенен. Мындан эки жыл мурда Алтай аймагын аралап, кыргыздар тууралуу бир топ маалыматтарды чогултуп, жаңы ачылыштарга ээ болдук. Эми анын баарын иликтеп, тактап чыгуу милдети турат", — деди Арзыбаев.
Ал быйыл 27-августтан 31-августка чейин Бишкек шаарында өтө турган Алтай коференциясына Кыргызстан тарап жогорку деңгээлде даярданып жатканын кошумчалады.
