БИШКЕК, 25-июл. — Sputnik. Борбор калаанын мэриясы чоңдор менен балдардан Дайыр Асанов атындагы парктагы эстеликтер менен монументтерге чыгып алып, тебелеп-тепсеп бүлдүрбөөнү суранат. Бул туурасында муниципалитеттин маалымат кызматы билдирди.
Анда Октябрь районунун админстрациясы акыркы учурларда аталган паркка орнотулган эстеликтердин талкаланып, тебеленип-тепселип жатканын кабарлаган.
"Коюлган эстеликтер менен монументтер сиз менен биздин кайраттуу, баатыр мекендештерибизге көрсөткөн сый-урматыбыз. Алар каардуу согушта каармандык менен туруп, душманды жеңип, биздин үйүбүзгө тынчтык алып келишкен эмеспи", — деп айтылат маалыматта.
"Октябрь районунун урматтуу калкы. Сиздерди муниципалдык мүлктөргө аяр мамиле жасоону өтүнөбүз. Мэрия чоңдор менен балдардан Дайыр Асанов атындагы парктагы эстеликтер менен монументтерге чыгып алып, тебелеп-тепсеп, бүлдүрбөөнү суранат", — деп айтылган таратылган маалыматта.
Бул гүлбак борбор калаанын түштүк тарабында жайгашкан, аянты 35 гектар. Улуу Ата мекендик согуштун катышуучусу, генерал Дайыр Асановдун атын алып жүрөт.
