Жарандардын финансылык сабаттуулугун жогорулатуу зарыл. Анткени, ар бир адам акча каражатын колдонот. Мындай пикирин Алмаз Шабданов Sputnik Кыргызстан радиосунун "Ачык кеп" программасында маек куруп жатып билдирди.
Анын айтымында, өнүккөн мамлекеттерде финансылык билим берүү мектеп партасынан башталат.
"Бизде калк өз каражатын туура колдонууну өздөштүрө элек. Мисалы, тапкан акчасына бир чоң үй куруп алат. Ал үйдү жылытыш керек, жасалгалаш керек, кайра эле чыгымга дуушар болушат. Ал эми финансылык жактан билимдүү мамлекеттердин жарандары үнөмдүү үйлөрдө жашап, үнөмдүү автоунааларды айдашат. Финансылык билимди орто мектептен баштап киргизсек туура болоор эле. Учурда бизде жогорку окуу жайларында гана окутушат, ал дагы жетиштүү деңгээлде эмес", — деди Шабданов.
Адис калктын каржылык билимин жогорулатмайын, өлкөнүн экономикасы өнүкпөйт деген оюн кошумчалады.
