БИШКЕК, 22-июл. — Sputnik. Жекшемби күнү Ысык-Көлдө "Азаттык" үналгысынын кыргыз кызматынын журналисти Улан Эгизбаев сууга чөгүп, каза болду. Бул тууралуу кабарды Ысык-Көл облустук милициянын маалымат катчысы Сталбек Усубакунов тастыктады.
Билдирүүгө караганда, облустук милицияга кабар саат 14.30дар чамасында түшкөн.
"Улан Эгизбаев аттуу журналист 19-июль күнү Кара-Ой айылындагы "Акун" пансионатына жубайы менен эс алууга келген экен. Бүгүн номерин тапшырып, кетээр алдында сууга түшүп алуу максатында көлгө барып, кырсыкка учураптыр", — деди Усубакунов.
Улан Эгизбаев 1990-жылы Нарын облусунун Кочкор районунда туулган.
2014-жылдан бери "Азаттык" үналгысында эмгектенип, коомдогу талуу маселелер боюнча журналисттик иликтөөлөрдү жүргүзүп келген.
Sputnik Кыргызстан маалымат агенттиги менен радиосу Улан Эгизбаевдин үй-бүлөсүнө, жакын туугандарына жана "Азаттык" үналгысынын жамаатына терең кайгыруу менен көңүл айтып, азасын тең бөлүшөт.
