БИШКЕК, 17-июл. — Sputnik. Социалдык тармактардын биринде "Мен Кытайдамын" деген долбоор жана анын алкагында сейрек кесиптердин сунушталып жатканы туурасында маалымат тараган. Бул туурасында РИА Новости "Синьхуа" агенттигине шилтеме берип жазды.
Шаолинь монастрында кун-фу боюнча чебердин окуучусу жана панда багуучу, жогорку ылдамдык менен жүргөн поезддерди тейлеген адис, Чжанцзяцзе багында улуттук кийимчен жүрүп таштанды чогулткуч кесиптери сунушталган. Андан сырткары, уйдун этинен камыр кесме жасаган ашпозчу, Цинхай-Тибет жолунда жүрө турган айдоочу сыяктуу кесиптер ачылган.
"Бул жумушчу орундар кытай маданияты менен коомчулугунун символу жана элементтери. Чет элдиктер дал ушул кесиптер менен эшиги дайыма ачык жана ар түрдүү болгон Кытайды тааный алат", — деп билдирген аталган компаниянын маркетинг боюнча директору.
Долбоорго катышуу үчүн алты айдын ичинде арыз калтырса болот.
