БИШКЕК, 15-июл. — Sputnik. Кыргызстандык спортчу Дмитрий Новиков жиу-житсунун Ne Waza версиясы боюнча Азия чемпионатынан коло байге утту. Бул туурасында Кыргызстандын Жиу-житсу федерациясынан кабарлашты.
Азия чемпионаты 10-июлда Казакстандын Актау шаарында башталган, эртең, 16-июлда жыйынтыкталат. Мелдеште 20 өлкөнүн атынан 420дай спортчу күч сынашууда.
Кыргызстандын курама командасынан төрт киши аттанган. Жыйынтыгында бир гана спортчу байгелүү орунга ээ болду. 69 килограмм ченде Дмитрий Новиков коло байге утту.
"Новиков 1/16 финалдан баштап, жалпысынан беш кармаш өткөрдү. Төртүнчү кармашка келгенде утулуп, коло байге үчүн болгон беттеште жеңди. Атаандаштары индиялык, монголиялык, таиланддык жана казакстандык балбандар болду", — деп айтылат маалыматта.
Белгилей кетсек, жиу-житсунун Ne Waza версиясында спортчуларды курларга бөлүү деген жок, маселен, бир салмак категориясында көк курдун ээси ак курдун өкүлү менен күч сынашып калышы мүмкүн.
