БИШКЕК, 9-июл. — Sputnik. Негизи Кыргызстанда идеяга бай адамдар көп. Мисалы, бир кыз эч кыйналып-кысталбай туруп үйлүү жана унаалуу болуунун жолун тапса, бир жигит койлорун ары-бери кадимки лимузинге салып ташып жүрөт.
1. Чычкан жеген адам. Facebook тармагынын колдонуучусу чет өлкөлүк жигиттерге турмушка чыксам деп кыялданган кыздардын намысына тийгиси келген окшойт. Тамактануу жайында отуруп, чычкандын балдарын тирүүлөй жеген кытай жигиттин видеосун жарыялап койду эле, элдин баары талкуулап жатып калышты.
2. Гениалдуу идея. Бул видеону көрсөңүз, бир чети күлүп, бир чети бул арыкты курган адамдардын "акылына" таң бересиз. Интернет колдонуучулар аларды "апендилер, кемчонтойлор" деп урушуп ийишти.
3. Акылдуу кыз. Кыргызстандык кыз канткенде жанды кыйнабай туруп үйлүү-жайлуу болуп калуунун айласын тапты. Ал "ар бирибиз бир сомдон эле чогултсак, мага үй дагы, машина дагы келип калат экен" деген сунушун жазды эле дароо жигити болгусу келгендер пайда болду.
4. Өзбек ырчысы "Кыргыз жерин" созгондо… Өзбек ырчысы Мамурахон Хайитмухаммедова кайсы бир иш-чарада Апаз Жайнаковдун "Кыргыз жерин" созолонто ырдап, залда отургандардын купулуна толгон экен. Интернет колдонуучулар дагы алкыш айтып, мактап жаткан кез.
5. Лимузиндеги койлор. Бул окуя качан, кайсы жерде болгону белгисиз. Бирок Кыргызстандагы эле айылдардын биринде экени көрүнүп турат. Видеонун автору кыргыз тилинде сүйлөп "Эл лимузин менен ЗАГСка барса, бул жакта лимузинде койлор жүрөт" деди таңданды. Айдоочунун ким экени, унаага кантип келип отурганы көрүнбөйт, бирок аягында эшигин тарс жаап, койго толгон темир тулпарды зуулдата айдап кетет.
6. Тонолгон күйөө бала. Балдыздар үйгө биринчи жолу келген жездеси менен күйөө жолдоштун чөндөгүн аңтарып айласын алты кетирди. Тиги экөө да момоюп турат, баарына макул болуп. Өздөрү деле ушуга даяр болуп келсе керек, ар кайсы чөндөгүнөн акча чыгып жатат.
7. Өзүнөн биринчи телефонун ойлоп… Курбусун сууга ыргытам деп өзү түшүп кеткен кыздын көлдөн чыга калып, сырттагы кыздарга колун сунгандын ордуна чөнтөк телефонун сунганы көпчүлүктү күлкүгө салды. "Биринчи өзүн ойлобойбу" дегендер болду. Өзү чабак урганды билсе коркунуч жок, телефондо "көп нерсе" бар да.
8. Интернетке наалат айткан бөбөк. Бул видеодон апасы менен атасынын телефон тиктегенине айласы кеткен наристенин арманын уксаңыз болот.
